Gwen Meets: C. Ghaist

Gwen: Guid mornin. Ah'm here frae Scottish Language Dictionaries tae see if Ah can find oot a wee bit aboot goulies an ghaisties. Wid ye mind tellin me a wee bit aboot yersel?

Ghaist: Nae bother, hen. Whit wid ye like tae ken? Ah'm the kenspeckle spectre o Sauchiehall Street. And Ah moonlicht as the Bogle o the Buchanan Galleries. 'Moonlicht!!!'. Jist ma wee joke, hen!

Gwen: Does it bother you that maist fowk are feart o ye.

Ghaist: It disnae fash me at aw. Fleggin fowk is whit Ah dae for a livin!

Gwen: Dae ye hae ony bad habits?

Ghaist: Ah maybe watch ower much TV. See me, A can float ootside ane o thae electrical shops aw nicht. We never had nane o thae things in ma day.

Gwen: Fave holiday destination?

Ghaist: A like tae gang up tae Deeside. There's some rare castles up there just bung fou o atmosphere, An ye get tae mix wi some awfae posh green ladies and the like.

Gwen: Fave colour?

Ghaist: Like maist ghaists, A tend tae favour grey or green. Maybe white for spectral occasions. See me, conventional. That's whit Ah am. I dinnae like nuthin ower phosphorescent.

Gwen: Fave music?

Ghaist: Ony o the goth bands. They're pure dead brilliant.

Gwen: Fave celeb?

Ghaist: Caspar's fit, and they say he's a nice dude in real daith. O the aulder anes, Ah like Banquho. He's a bit o a radge.

Gwen: Fave food?

Ghaist: That's an awfie tactless question. Ah'm jist deein for a piece on jam an a cuppie tea and A've no been able tae digest a thing for three hunner year. Ah've nae real substance ye see. If ye gied me a sup o yer Irn Bru, it wid jist faw richt through me and mak a puddle on the flair. Weel Ah cannae stop here bletherin a nicht. Places tae gang, people tae haunt ye ken. Nae rest for the wicked. Awrrabest, hen! See ye aboot!