|
|
|
MEY HANSEL
A HANSEL is a guid luck gift or a walcome present, aft associatit wi new beginnins. Ye micht tak a hansel tae a new bairn or ye micht hansel a new hoose wi a wee present the first time ye visit. It micht be the siller a trader gets for his first sale, or a gift that chynges haunds tae seal a bargain. Ye micht hansel a thing jist by yaisin it for the first time. Ye micht gie a hansel at New Year and Hansel Monday is the first Monday efter the New Year, aince observed as a holiday by ferm servants. It comes fae Auld Norse handsal, the transference o a richt, bargain or duty tae anither by jynin haunds. It is the wird walit for the cover design o Perspectives on the Older Scottish Tongue a new buik tae celebrate the publication o the Dictionary of the Older Scottish Tongue (DOST) whilk wis feenisht in 2002 efter a lang darg stertit in 1925. The buik is, in its wey, a hansel for DOST and a celebration o the Scots Language. Perspectives on the Older Scottish Tongue wad mak a braw hansel for onybodie wi an interest in Scots and Scotland. It haes contributions on subjecks as diverse as wine, cereals, law and buildin and airticles wi tantalisin titles like: 'Was it murder?' and muckle mair. Perspectives on the Older Scottish Tongue, Kay, C. and Mackay . M (eds.), 2005, Edinburgh: EUP. ibsn 0-7486-2281-0 |