Thief
Angela Blacklock-Brown
Thon wee moose wisnae feart,
timorous beastie ma muckle fit,
nipped in thru ma back door,
then slipped intae the press,
the wee toe-rag! Baggsed the
chocolate buttons Ah’d pit by for the weans.
Nae hard cheese for him, if ye please!
Must huv hid teeth like pinkin sheers,
ripped zig-zags oot o the packet.
Ah nivir heard a squeak,
The telly wis makin a fair racket.
Unusual fur me no tae see
whit’s goan oan.
