Story sterters
Here are twa ideas for screivin stories.
Click on the link at the end tae doonload the Story Ideas.
Story Ideas
The Coming of the Wee Malkies
The Coming of the Wee Malkies by Stephen Mulrine micht be a poem ye ken weel. Ye can hear it on the Learning and Teaching Scotland wabsteid. It’s aw aboot some Glaswegian nickums. The poem asks fowk whit they micht dae if the Wee Malkies cam. Some fowk maun be feart.
Ye micht want tae hae a go at scrievin aboot fowk wha are feart. In the next section there’s a bit o scrievin tae get ye stertit. This is Sci Fi.
Story Sterter
Context: Efter 2080. The Purifiers hae invadit an decidit that fowk winnae hae oniethin like strang drink or cigarettes or sweeties. Awbodie maun be hardy an weel. They hae a video−link tae vizzy awbodie. They hae informers, in ilka cless in the scuil, cried Snotters, wha clype on the bairns. The Snotters hae a muckle letter S on thir semmits. The laddie tellin the story is cried Ewan an he his a pal cried Susan. Susan his a saicret kist o taiblet (a braw sweetie that’s noo forbidden).
Suggestions for stertin the story
Read this first an try tae get a sense o it.
Read it anither time an scrieve doon onie wirds ye micht like tae leuk up.
It is aw quate, naethin is daein. It feels like snaw his fan. Naebodie is aboot. It his bin like yon syne the Purifiers came, like we hae bin dustit wi snaw. Naebodie gaes tae the scuil onie mair, an they hae burnt aw the sweetie shoppies. We canna hae shuggar onie mair. Oor mithers an faithers think it is braw. They are fair pleased wi yon Maister−Video Screen that is on the wa in awbodie’s hoose. It tells thaim things lik “Nae mair sweeties fur bairns”.
Can they no lave us alane? Tak the tabackie awa fae yon Auld Yins. Mak thaim stap aw yon drinkin, bit lave us alane. A fair miss ma sweeties. A can only jist mind whit they war like. A wad slaiver whan a sweetie wis on ma tung. Ma faither telt me aw aboot a buik cried Charlie and the Chocolate Factory aince. A wad like tae read that buik.
2080 wis whan awthin chynged. If ye wir caucht wi the reek o sweeties on yer breath, ye wad get intae sic bother. Thon Purifiers wad tak us an gie us a ragin. Yer mither wad get her heid in her hauns agane an yer faither wad get the heave fae his wark.
Purifiers hae recruited some clypes fae the scuil. We cry thaim Snotters acause they ayweys hae green semmits on wi a muckle S on the back. We cowp thaim ower. Splat! Oor green freens land sair on thir bahookies. We arnae vext. We greet wi lauchin as we tak the rise o thaim. Aw the laddies come doon tae the skatin rink whar we hing aboot, it is nar the Leisure Centre. We hae pairties an flee aboot on autoskates. The sleekit Snotters breenge in an, whan they see whit we are daein, they tell awthin tae the coorse Maister−Purifiers.
Susan, een o the quines in ma cless his her ain kist o tablet. A fair like Susan, she is loosome an she his a surfat o tablet. Aye, A like Susan.
Suggestions
Ye micht like tae see if ye can answer the questions on the story.
Whan did the Purifiers come?
Whit dae the Auld Yins think aboot this?
Whar dae the bairns gae tae hing oot?
Whit dae ye ken aboot the Snotters?
Whit wirds are made up for things that havnae been inventit yet?
Noo ye can mak an endin fur yersel.
Whit wad happen noo? Wad Susan git intae bother? Wad the Purifiers ayeweys be maisters ower the warld? Whit wad ye dae if the Purifiers cam?
