Dialect
Annie fae Dundee (from Scotspeak)
Scots is nae a dialect o English bit a leid in its ain richt. Read aw aboot the History o the Scots Language on oor wabsteid.
Maist languages hae a nummer o dialects. Dialects hae their ain local wirds or their ain meanins for thae wirds. Ye micht hae heard o Doric or the Shetland dialect. Try tae find oot aboot ither dialects o Scots.
Ye micht recognise a dialect as comin fae a particular area o the kintra bi the pronounciation. Fowk in Aiberdeen speak Scots differently fae fowk in Dundee or Glesga. Whiles fowk a few miles fae ane anither aften yaise different dialect wirds an different grammar an thay pronounce wirds differently. Scots scrievers yaise their ain voice in their scrievin.
Ye can think on yer ain dialect o Scots an think on the weys it is different fae ither fowk. Even in the community o scuil, teachers, pupils, parents an carers micht hae a hail range o accents an dialects. If ye arnae a Scots speaker, ye wull hae yer ain leid an wirds tae think aboot.
We hae some audio clips o fowk fae different pairts o the kintra. Listen tae thaim an enjoy the rhythm o their voices.
Things tae think on:
Whaur dae the fowk come fae?
Whit differences are therr in the wirds they yaise or the order o the wirds?
Ye can discuss aw the similarities tae.
We wud lik tae hae samples o fowk talkin aboot their hobbies fae aw roon the kintra. If ye hae a sample as an MP3, sent it tae us an we can shaire a selection wi ithers.
Farder research
A weel-kent North-East feature is f-whaur ither dialects hae wh- (fa for who and fite for white). Dae ye ken ony ither examples?
A weel-kent feature o Southern Scots is the occurance o ow whaur ither dialects hae wirds sic as yow (you). Dae ye notice ony ither features o Southern Scots?
North-East Scots are mair likely tae say baa an snaa whaur Central an Wast Coast Scots wad say baw an snaw. Whit ither wirds (like this) wad ye listen for tae wirk oot if a speaker wis fae the North-East or Wast Central?
Tags (like ken, like, likesay) aften gie guid clues. Whaur aboot dae fowk yaise ken as a tag? Whaur dae they no yaise it?
References
Scotspeak
Robinson, C. and C. A. Crawford (2011) Scotspeak Edinburgh: Luath Press Ltd.
